logo-en

  NORTHERN UNIVERSITY

ARCAX1

Ի նպաստ Հայաստան-Արցախ-Սփյուռք եռամիասնության ամրապնդման

Ապրիլի 11-13-ը Արցախի Հանրապետությունում անցկացվեց Ղարաբաղյան շարժման 30-րդ տարեդարձին նվիրված ուսանողական համահայկական ֆորում, որին մասնակցում էին  Հայաստանի և Արցախի Հանրապետությունների բարձրագույն ուսումնական հաստատությունների ավելի քան 100 ուսանողներ: Ֆորումին մասնակցում էր նաև Հյուսիսային համալսարանը՝ ուսանղական խորհրդի նախագահ Մադլենա Շահբազյանի գլխավորությամբ: Ֆորումի շրջանակում բարձրաձայնվեցին և քննարկվեցին ուսանողությանն ու երիտասարդությանը հուզող բազմաթիվ խնդիրներ։

Ֆորումի հանդիսավոր բացման արարողությանը ողջույնի խոսքով հանդես են եկել ԱՀ ԿԳՍ նախարար Նարինե Աղաբալյանը, ԱՀ ԱԺ արտաքին հարաբերությունների մշտական հանձնաժողովի նախագահ Արզիկ Մխիթարյանը, ԱրՊՀ ռեկտոր Մանուշ Մինասյանը:

Ֆորումի և գիտաժողովի բացման հանդիսավոր նիստի ընթացքում ցուցադրվել են  արտերկրում հայանպաստ գործունեություն ծավալող հասարակական, քաղաքական, մշակութային գործիչների ուղերձները՝ Ղարաբաղյան շարժման 30-ամյակի կապակցությամբ, ինչպես նաև ՀՀ նախագահի աշխատակազմի հանրային կապերի և տեղեկատվության կենտրոնի կողմից պատրաստված «Պաշարվածները» ֆիլմը:

Ապրիլի 13-ին ուսանողական ֆորումի մասնակիցները  հանդիպել են Արցախի Հանրապետության խորհրդարանի ղեկավար Աշոտ Ղուլյանի հետ: 

Ողջունելով ԱՀ և ՀՀ բուհերի ուսանողներին` ԱԺ նախագահը կարևորել է ուսանողական ֆորումի նշանակությունը` ուսանողներին միասնական ազգային գաղափարների շուրջ համախմբելու, հայկական երկու հանրապետությունների ուսանողական կառույցների  միջև փոխգործակցությունը ակտիվացնելու տեսանկյունից: ԱԺ նախագահը պատասխանել է նաև ուսանողների հարցերին:

Ապրիլի 13-ին Գանձասարում ամփոփվեցին Արցախյան շարժման 30-ամյակին նվիրված համահայկական ուսանողական ֆորումի աշխատանքները: Փակման հանդիսավոր արարողությանը ներկա էին ՀԱԵ Արցախի թեմի առաջնորդ Պարգև արքեպիսկոպոս Մարտիրոսյանը, ԱՀ ԱԺ նախագահ Աշոտ Ղուլյանը, ԱՀ ԱԳ նախարար Մասիս Մայիլյանը, ԱրՊՀ ռեկտոր Մանուշ Մինասյանը, դասախոսներ, ուսանողներ:

Հայկական երկու հանրապետությունների բարձրագույն ուսումնական հաստատությունների ավելի քան 100 ուսանողներ «Մատենադարան-Գանձասար» գիտամշակութային կենտրոնում հանրագումարի են բերել եռօրյա ֆորումի արդյունքները. ուսանողության տպավորությունները դրական են, իսկ աշխատանքների արդյունքները շոշափելի իրողություն կդառնան` գիտական հանրույթին ներկայացնելով Ղարաբաղյան շարժման 30- ամյակին նվիրված շուրջ 150 գիտական հոդված, որը նախատեսվում է առաջիկայում տպագրել առանձին ժողովածուով: Փակման հանդիսավոր արարողությանը ԱՀ ԱԺ նախագահ Աշոտ Ղուլյանը, կարևորելով երիտասարդության դերը երկրի պետականաշինության գործընթացում, ընդգծել է. «18-20 տարեկան երիտասարդներին վստահված է մեր երկրի սահմանների պաշտպանությունը, և այդ առաքելության շարունակությունը դուք եք իրականացնում` այցելելով Արցախ և քննարկումներ ծավալելով, տեսակետներ առաջադրելով մեր զարգացման հեռանկարների շուրջ: Մենք պետք է լավատես լինենք. դա հաջողության հասնելու գրավականներից է: Բավական է հիշել, թե 88-ին ինչից ենք սկսել, ինչ ենք հաղթահարել և ինչ ունենք այսօր: Այն, ինչին մեզ հաջողել է հասնել, շատ լավ հիմք է, որպեսզի ապագայում ավելի մեծ հաջողություններ կարողանանք արձանագրել»:

Ավարտին ուսանողները հանդես են եկել ֆորումի աշխատանքների արդյունքներն ամփոփող համատեղ հայտարարությամբ, որտեղ ասված է.

«Մենք` 2018թ. ապրիլի 11-13-ը Արցախի Հանրապետությունում անցկացված Ղարաբաղյան շարժման 30-րդ տարեդարձին նվիրված ուսանողական համահայկական ֆորումի մասնակիցներս, պատմական Գանձասարում հանրագումարի բերելով նախորդ օրերի քննարկումները և ամփոփելով ֆորումի աշխատանքները.

կարևորում ենք հայկական բուհերի ուսանողներին համազգային գաղափարների շուրջ միավորելու անհրաժեշտությունը` ընդգծելով Ղարաբաղյան շարժման 30-ամյա պատմության ընթացքում ունեցած ձեռքբերումները, որում անուրանալի է նաև երիտասարդության ներդրումը:

Հավաստում ենք, որ Հայաստանի, Արցախի և Սփյուռքի երիտասարդությունը համախմբված է մայր Հայաստանի և նրա անքակտելի մասը հանդիսացող հայկական երկրորդ հանրապետության տարածքները պաշտպանելու և հայոց պետականության սահմաններն անառիկ պահելու նպատակի շուրջ:

Փաստում ենք, որ արդի մարտահրավերներին դիմակայելու համար անհրաժեշտ է կրթական և երիտասարդական ճիշտ քաղաքականության իրականացմամբ ձևավորել ինտելեկտուալ ու ժամանակակից երիտասարդություն` խթանելով վերջինիս ներգրավվածությունը պետության զարգացման գործընթացներում, հասարակական, քաղաքական կյանքում:

Ընդգծում ենք ԱՀ և ՀՀ ուսանողական և երիտասարդական կառույցների պատրաստակամությունը` միասնական ջանքերով նպաստելու Արցախի Հանրապետության միջազգային ճանաչմանն ուղղված քայլերին` գիտական, կրթական, հասարակական և այլ հարթակներում: Միևնույն ժամանակ կարևորում ենք Արցախի Հանրապետության ուսանողության համար միջազգային փոխանակման և կրթական այլ ծրագրերի մատչելիության ապահովումը:

Հաստատում ենք Արցախում հայկական երիտասարդական կազմակերպությունների, ուսանողական ինքնավար մարմինների մասնակցությամբ համաժողովների, քննարկումների պարբերական կազմակերպման ու շարունակականության կարևորությունը` դիտարկելով դրանք որպես երիտասարդության համախմբում համահայկական գաղափարների շուրջ` ի նպաստ Հայաստան-Արցախ-Սփյուռք եռամիասնության ամրապնդման և ի շահ միասնական հայրենիքի կայուն զարգացման:

Գ ա ն ձ ա ս ա ր

13 ապրիլի 2018թ

 

Հայտարարություններ

Պայմանագրի շնորհման հայտարարություն

09.11.2018
Պայմանագրի շնորհման հայտարարություն

ՀԱՅՏԱՐԱՐՈՒԹՅՈՒՆ«Հյուսիսային համալսարան» ՍՊԸ-ի կողմից իրականացվող «Հեռակա ուսուց...

Թափուր աշխատատեղ

16.10.2018
Թափուր աշխատատեղ

Հյուսիսային համալսարանը հայտարարում է մրցույթ ներքոհիշյալ ամբիոններում ամբիոնի...

Main News