Հասցե՝ |
ՀՀ. ք. Երևան 0070, Ալեք Մանուկյան 15ա |
Հեռ. (+37410) 554052, 573317, 554135 |
E-mail info@northern.am |
Հոգեբանության ֆակուլտետի ուսանողուհիները՝ Էմման, Նոնան և Մերին, աշխատում են արցախցի երեխաների հետ: Առաջին հանդիպման ջերմ, անմիջական միջավայրը, որը ստեղծվեց մեր ուսանողուհիների շնորհիվ, հնարավորություն տվեց թոթափել ռազմական գործողությունների հետևանքով Հայաստան տեղափոխված փոքրիկների լարվածությունն ու վախերը: Հատուկ խաղերը և նկարչությունը, որոնք ընտրվել էին որպես հոգեբանական ներգործության միջոց, բարերար ազդեցություն ունեցան փոքրիկների վրա: «Երեխաներն աստիճանաբար ներգրավվեցին խաղի մեջ, սկսեցին աշխուժորեն շփվել մեզ հետ, այնուհետև անցան նկարելուն: Կարճ ժամանակ անց տիրում էր այնպիսի զվարթ մթնոլորտ, որ նույնիսկ մենք մոռացանք, որ պատերազմ է: Թերևս այս հանդիպումը օգտակար էր երկուստեք»,- պատմում է Նոնա:
Նշենք, որ հոգեբանության ֆակուլտետի չորրորդ կուրսի ուսանողները ռազմական գործողություններին հաջորդած օրերին կազմել են աշխատանքային ծրագիր՝ Արցախից Հայաստան տեղափոխված ընտանիքների տարբեր տարիքի երեխաներին և ծնողներին հոգեբանական ծառայություններ մատուցելու նպատակով: Հատուկ աշխատանքային ծրագիրը կազմած է այն ընտանիքների համար, որոնց անդամները մասնակցել են պատերազմին, կամ որոնք ապրում են այն շրջանում, որտեղ պատերազմական գործողություններ են ընթացել և ընթանում։
Ավելի շատ մասնակիցներ ներգրավելու համար բուհի պաշտոնական կայքէջում զետեղվել է հայտարարություն, ինչպես նաև կապ է հաստատվել Հայաստան տեղափոխված արցախցիների խնդիրներով զբաղվող կենտրոնի հետ: Համալսարանի կողմից արցախցի մեր հայրենակիցներին տրամադրվող հոգեբանական ծառայությունները կունենան շարունակական բնույթ՝ ընդգրկելով ինչպես տարբեր տարիքի երեխաներին, այնպես էլ նրանց ծնողներին: Հոգեբանության ֆակուլտետի ուսանողուհիները՝ դասախոս Մարինե Մամիկոնյանի գլխավորությամբ, պատրաստ են իրենց ուժերի ներածին չափով նպաստել արցախցի մեր հայրենակիցների հոգեկան ներդաշնակության ու խաղաղության վերականգնմանը: Իսկ բուհի ղեկավարությունը դրա համար ներդնում է անհրաժեշտ բոլոր միջոցները:
Լրատվության և հասարակայնության հետ կապերի բաժին
Հյուսիսային համալսարանում հոկտեմբերի 14-ին անցկացվեց առաջին բուժօգնության սեմինար՝ ուսանողների և դասախոսական կազմի մասնակցությամբ: Ինչպիսի՞ն պետք է լինի առաջին օգնությունը վնասվածքների, հրազենային վիրավորումների, արնահոսության ժամանակ՝ մարդու կյանքը փրկելու և հետագա բարդությունները կանխելու նպատակով: Այս ամենին հանգամանալից կերպով անդրադարձավ համալսարանի բժշկական քոլեջի թերապիայի, վիրաբուժության և քույրական գործի դասախոսը՝ նշելով, թե որքան կարևոր է հատկապես ռազմական գործողությունների ժամանակ վիրավորներին ցուցաբերած գրագետ օգնությունը՝ նախքան բժշկական օգնության տեղ հասնելը: Խոսվեց նաև արնահոսության, վնասվածքների ու ջարդվածքների տեսակների, դրանցից յուրաքանչյուրի ժամանակ ցուցաբերվող օգնության, ճիշտ վիրակապելու մասին: Եվ քանի որ հաճախ առաջին ճիշտ օգնության ցուցաբերումով է պայմանավորվում հետագա բուժօգնության հաջողությունը, ուստի այս դասընթացին ձեռք բերած գիտելիքները չափազանց օգտակար են հատկապես մեր երկրի սահմաններում ընթացող ռազմական գործողությունների ժամանակ: Նշենք նաև, որ դասընթացը տեղի ունեցավ համալսարանի՝ քաղպաշտպանության համար նախատեսված նկուղային հարկում, որը ռազմական գործողությունները վերսկսվելուն պես համալրվել էր առաջին անհրաժեշտության պարագաներով և հարկ լինելու դեպքում կտրամադրվի ինչպես բուհի ուսանողությանն ու աշխատակիցներին, այնպես էլ հարակից շենքերի բնակիչներին:
Լրատվության և հասարակայնության հետ կապերի բաժին
Հյուսիսային համալսարանի գործընկեր բուհ հանդիսացող Հունաստանի միջերկյածովյան համալսարանը ս․ թ․ հոկտեմբերի 15-ին կազմակերպում է գիտաժողով "5G Communications" թեմայով, որի կազմակերպիչներից մեկն էլ հենց մեր բուհն է։ Գիտաժողովի սկիզբը 12:00-ն է։
Մասնակցելու համար անհրաժեշտ է նախապես գրանցվել հետևյալ հղումով․
Խոսնակների մասին տեղեկատվությունը հասանելի է այստեղ https://www.athenaeuropeanuniversity.eu/webinar-in-5g-communications-an-introduction-to-the-public/։
Գիտաժողովի աշխատանքային լեզուն անգլերենն է։
Հյուսիսային համալսարանի արտաքին կապերի բաժին