| Հասցե՝ |
| ՀՀ. ք. Երևան 0070, Ալեք Մանուկյան 15ա |
| Հեռ. (+37410) 554052, 573317, 554135 |
| E-mail info@northern.am |
- Գլխավոր
- Նորություններ
Արտակարգ իրավիճակով պայմանավորված՝ Հյուսիսային համալսարանում մարտ ամսից բոլոր ֆակուլտետներում առկա ուսուցման դասերն անցկացվել են առցանց եղանակով: Օգտագործելով հեռավար ուսուցման բոլոր հնարավոր հարթակները՝ ոչ միայն հաջողությամբ կազմակերպվեցին դասերը, այլև ստուգարքներն ու քննությունները: Իսկ ավարտական աշխատանքների ու մագիստրական թեզերի պաշտպանություններն անցնում են տեխնիկապես անթերի մակարդակով՝ հնարավորություն տալով ուսանողներին լավագույնս դրսևորելու իրենց գիտելիքները: Ավելորդ է ասելը, որ նման արդյունքը պայմանավորված է համալսարանի բոլոր ստորաբաժանումների համակցված աշխատանքով, երբ յուրաքանչյուր աշխատակից՝ տեխնիկական անձնակազմից մինչև դասախոս, դեկան ու ամբիոնի վարիչ, արդեն իսկ հմտորեն տիրապետում է նորագույն տեխնոլոգիաների, մասնավորապես հեռավար դասընթացներ անցկացնելու առանձնահատկություններին:
Նկատի ունենալով հանրապետությունում համաճարակով պայմանավորված արտակարգ դրության երկարաձգումը՝ հունիսի 15-ին Հյուսիսային համալսարանում անցկացված ռեկտորատի նիստում որոշում ընդունվեց շարունակել առցանց դասավանդումը նաև հեռակա ուսուցման համակարգում: Այսպիսով, տեղեկացնում ենք, որ բակալավրի կրթական ծրագրի հեռակա ուսուցման 1-4 կուրսերի և մագիստրոսի կրթական ծրագրի 1-2 կուրսերի երկրորդ կիսամյակի դասերը կանցկացվեն հունիսի 22-ից մինչև հուլիսի 8-ը: Քննաշրջանը սահմանվել է հուլիսի 9-18-ը: Մինչ առցանց հանդիպում:
Լրատվության և հասարակայնության հետ կապերի բաժին
Հյուսիսային համալսարանի իրավագիտության ֆակուլտետում այսօր ավարտական աշխատանքների ու մագիստրական թեզերի առցանց պաշտպանության վերջին օրն էր: Այսինքն, բուհի մեկ ֆակուլտետ ևս հրաժեշտը տվեց իր ուսանողներին՝ նրանց կյանք ճանապարհելով գիտելիքների մեծ պաշարով, ինչը լիովին դրսևորվեց պաշտպանության ընթացքում: Շնորհակալություն ենք հայտնում քննական հանձնաժողովի բոլոր անդամներին՝ անաչառության ու համբերատարության, ֆակուլտետի աշխատակիցներին ու տեխնիկական անձնակազմին՝ պաշտպանությունները պատշաճ մակարդակով կազմակերպելու համար: Իսկ մեր սիրելի ուսանողներին հաջողություններ ենք մաղթում իրենց հետագա մասնագիտական գործունեության մեջ՝ վստահ, որ նրանք համալրելու են Հայաստանի Հանրապետության անաչառ, գիտակից ու պրոֆեսիոնալ իրավաբանների շարքերը և աշխատելու են բացառապես օրենքի տառին համապատասխան:
Լրատվության և հասարակայնության հետ կապերի բաժին
Հյուսիսային համալսարանում շարունակվում է ավարտական աշխատանքների պաշտպանությունը առցանց եղանակով: Այսօր քննասենյակում են իրավագիտության ֆակուլտետի, ինֆորմատիկայի և հաշվողական տեխնիկայի ամբիոնի ուսանողները, որոնք ներկայացնում են իրենց ավարտական աշխատանքներն ու մագիստրական թեզերը: Իհարկե, առկա է քննություններին բնորոշ լարվածությունը, չէ՞ որ բակալավրիատի և մագիստրատուրայի ուսանողների համար վճռորոշ պահ է. նրանք պետք է ներկայացնեն ուսումնառության ընթացքում ձեռք բերված գիտելիքները, ապացուցեն, որ հետազոտական աշխատանքներ կատարելու ունակություններ են զարգացրել և, վերջիվերջո, արդեն պատրաստ են հասուն ու պրակտիկ գործունեության: Պաշտպանությանը մասնակցում են նաև ուսանողներ Մոսկվայից, Վորոնեժից, Անապայից, Արցախից՝ հաջողությամբ ներկայացնելով իրենց ուսումնասիրությունների արդյունքները:
Պետք է նշել նաև, որ ավարտական աշխատանքների՝ արդեն չորս օր տևող պաշտպանություններն աչքի են ընկնում կազմակերպչական բարձր մակարդակով և անթերի տեխնիկական սպասարկմամբ: Մանկավարժության և բանասիրության ֆակուլտետի մասնագիտական հանձնաժողովի անդամները դրական են գնահատել նախորդ՝ համանուն ֆակուլտետում երեք օր տևած պաշտպանությունների ընթացքում ուսանողների ցուցաբերած գիտելիքներն ու ներկայացված աշխատանքների բարձր որակը:
Հավելենք նաև, որ Հյուսիսային համալսարանի ռեկտոր Մհեր Մակիչյանը ուղերձ է հղել ավարտական աշխատանքների պաշտպանության մեկնարկի առթիվ՝ շնորհավորելով դրա հաջող սկիզբն ու կարևորելով անթերի տեխնիկական սպասարկումը:
Լրատվության և հասարակայնության հետ կապերի բաժին
