Սիրելի՛ ուսանողներ, ճանաչե՛ք ձեր իրավունքները և հիշեք, որ ուսանողական բոլոր իրավունքներն ու պարտականությունները տանում են դեպի մեկ նպատակակետ՝ որակյալ, գիտելիքահեն կրթություն:

Ուսանողն իրավունք ունի՝

• ընտրելու մասնագիտություն, ուսուցման ձևը, զբաղվելու հետազոտություններով, ցանկացած կրթական աստիճանում ընդհատելու կամ շարունակելու բարձրագույն և հետբուհական մասնագիտական կրթությունը.
• ստանալու աշխատաշուկայի ժամանակակից պահանջներին համապատասխան գիտելիքներ.
• հաճախելու համալսարանում կազմակերպված դասախոսություններին.
• մասնակցելու ուսուցման որակն ապահովող գործընթացներին և գնահատելու պրոֆեսորադասախոսական կազմի գործունեության արդյունավետությունը.
• հիմնական մասնագիտական ուսուցումը համատեղելու երկրորդ մասնագիտական (զուգահեռ) ուսուցման հետ և ստանալու երկրորդ որակավորման աստիճան.
• օգտվելու գրադարանների, տեղեկատվական պահոցների, ուսումնական և գիտական ստորաբաժանումների, լաբորատորիաների, կրիմինալիստիկայի կաբինետի, լինգոֆոնային և համակարգչային լսարանների, իրավաբանական կլինիկայի ծառայություններից.
• համաձայնեցված կարգով օգտվելու դահլիճի, սպորտային դահլիճի, ինչպես նաև սոցիալ-կենցաղային, բուժական և համալսարանի այլ կառուցվածքային ստորաբաժանումների ծառայություններից:
• Հայաստանի Հանրապետության օրենսդրությամբ, բուհի կանոնադրությամբ և այլ իրավական ակտերով սահմանված կարգով ընդգրկվելու և մասնակցելու համալսարանի կառավարման մարմինների աշխատանքներին.
• միավորվելու ուսանողական խորհուրդներում, ուսանողական գիտական ընկերություններում և այլ ուսանողական կառույցներում.
• ըստ նախասիրությունների՝ մասնակցելու համալսարանում անցկացվող ուսանողական գիտահետազոտական ծրագրերին, գիտաժողովներին և սեմինարներին.
• սահմանված կարգով բողոքարկելու համալսարանի ղեկավարության որոշումներն ու կարգադրությունները,
• ծանոթանալու համալսարանի գործունեությունը կարգավորող ներքին իրավական ակտերին և ուսումնական փաստաթղթերին.
• սահմանված կարգով օգտվելու սովորողների համար համալսարանում սահմանված մի շարք արտոնություններից (ուսման վարձի զեղչեր, ուսման վարձի մասնակի փոխհատուցում, կրթաթոշակներ և այլն).
• սահմանված կարգով փոխադրվելու մեկ այլ ուսումնական հաստատություն՝ ներառյալ արտասահմանյան պետությունների համալսարաններ, օգտվելու միջազգային փոխանակման ծրագրերից:

Ուսանողների ինքնակառավարման, ներկայացուցչական ընտրովի մարմինը ուսանողական խորհուրդն է, որի ակտիվ գործունեության արդյունքում ձեր ուսանողական կյանքը կարող է դառնալ առավել հագեցած ու հետաքրքիր:

Ճանաչե՛ք ձեր իրավունքները:

Հյուսիսային համալսարանի ուսանողական խորհուրդը ուսանողության ներկայացուցչական, ապաքաղաքական, ինքնուրույն,  ինքնակառավարման մարմին է, որը կոչված է  պաշտպանելու ուսանողության շահերն ու իրավունքները, ապահովելու ուսանողների մասնակցությունը համալսարանի կառավարմանը, նպաստելու նրանց կրթական, գիտական, ստեղծագործական, ֆիզիկական, բարոյական և հոգևոր զարգացմանը, կազմակերպելու ուսանողների ազատ ժամանցն ու հանգիստը: 

Ուսանողական խորհրդի հիմնական նպատակներն են՝

1. պաշտպանել ուսանողների շահերն ու օրինական իրավունքները,
2. համալսարանի կառավարման համապատասխան մարմինների քննարկմանը ներկայացնել ուսանողությանն առնչվող հարցեր,
3. ապահովել ուսանողների մասնակցությունը համալսարանի կառավարմանը,
4. իրազեկել ուսանողներին իրենց իրավունքների ու պարտականությունների մասին, նպաստել ուսանողների իրավագիտակցական մակարդակի բարձրացմանն ու ակտիվ քաղաքացիական կեցվածքի ձևավորմանը,
5. մասնակցել ուսումնական գործընթացի կազմակերպմանը և ուսուցման արդյունավետության բարձրացմանն ուղղված ծրագրերի մշակմանն ու իրականացմանը,
6. ներգրավել ուսանողներին հասարակական կյանքում տեղի ունեցող տարբեր նախաձեռնությունների
7. միավորել համալսարանի ուսանողական կազմակերպությունների, ակումբների և միությունների ջանքերը՝ նպաստելու ուսանողության համար բարենպաստ միջավայրի ձևավորմանը և խթանելու ուսանողների գիտական, կրթական, հոգևոր, մշակութային, ստեղծագործական ու ֆիզիկական զարգացումը,
8. աջակցել ուսանողների սոցիալական վիճակի բարելավմանը, կազմակերպել ուսանողների ազատ ժամանցն ու հանգիստը,
9. նպաստել Հյուսիսային համալսարանում ներքին կարգապահության պահպանմանը
10. նպաստել ուսանողների համար կրթական և դաստիարակչական բարենպաստ միջավայրի ստեղծմանը

Ուսանողական խորհրդի իրավասություններն ու գործունեության շրջանակն ամրագրված է ՈՒԽ  կանոնադրությամբ: